ᓄᓇᓯ ᑯᐊᐳᕇᓴᒃᑯᑦ ᓄᑖᕐᒥᑦ ᐊᖏᔪᖅᑳᖅᑖᖅᑐᑦ ᓴᓇᕙᓪᓕᐊᓂᐊᖅᑐᒥᑦ ᐱᓕᕆᐊᖏᓐᓂ

ᐋᓂ ᐊᓐᓂᕐᒥᐅᖅ ᓄᓇᓯᒃᑯᑦ ᐊᖏᔪᖅᑳᕐᒧᑦ ᑐᖏᓕᖅᑖᖅᑲᐅᖓ ᒐᕙᒪᓕᕆᓂᕐᒧᑦ ᓄᓇᓕᕆᓂᕐᒧᓪᓗ ᐊᒻᒪᓗ ᒫᒋ ᐳᑐᓕᒃ ᐊᖏᔪᖅᑳᕐᒧᑦ ᑐᖏᓕᖅᑖᖑᓪᓗᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᖅᑎᐅᓪᓗᓂ

ᑲᓇᓐᓇᐅᑉ ᐅᑭᐅᖅᑕᖅᑐᖓᓐᓂ ᐱᑕᖃᐅᓂᖅᐹᖅ ᐃᓄᐃᑦ ᓇᒻᒥᓂᖁᑎᖓ ᐱᓕᕆᓂᕐᒧᑦ ᑯᐊᕈᕇᓴᐅᔪᖅ ᓄᑖᕐᓂᑦ ᐃᖅᑲᓇᐃᔭᖅᑎᑖᖅᑐᖅᑐᖅ ᐊᐅᓚᑦᑎᓂᕐᒧᑦ ᑎᒃᑯᐊᖅᓯᓪᓗᓂᓗ ᓄᑖᕐᓂᑦ ᐊᖏᔪᖅᑳᖑᖃᑕᐅᓂᐊᖅᑑᓐᓂᒃ ᐱᕈᖅᐸᓪᓕᐊᒍᒪᓪᓗᑎᑦ ᐱᓕᕆᐊᖏᓐᓂ ᐊᒻᒪᓗ ᐋᓐᓂᐊᖅᑐᓕᕆᓂᕐᒨᖓᔪᓂᒃ.

ᒫᓐᓇᕈᓗᒃ ᑕᖅᑭᐅᓚᐅᖅᑐᓂᒃ, ᓄᓇᓯ ᑯᐊᐅᕇᓴᒃᑯᑦ ᐃᖅᑲᓇᐃᔭᖅᑎᑖᓚᐅᖅᑐᑦ ᒪᕐᕉᓐᓂ ᐃᓅᓐᓂᒃ ᐊᕐᓈᓐᓂᒃ: ᐋᓂ ᐊᓐᓂᕐᒥᐅᑦ ᓄᑖᖑᓪᓗᓂ ᐊᖏᔪᖅᑳᑉ ᑐᖏᓕᕆᓂᐊᖅᑐᓂᐅᒃ ᒐᕙᒪᓕᕆᓂᕐᒧᑦ ᓄᓇᓕᕆᓂᕐᒧᓪᓗ, ᐊᒻᒪᓗ ᒫᒋ ᐳᑐᓕᒃ ᐊᖏᔪᖅᑳᑉ ᑐᖏᓕᖅᑖᕆᓪᓗᓂᐅᒃ ᐋᓐᓂᐊᖅᑕᐃᓕᒪᔪᓕᕆᓂᕐᒨᖓᔪᓂᒃ ᐱᔨᑦᑎᖅᑎᐅᓗᓂ.

ᓄᓇᓯᒃᑯᑦ ᓴᖅᑭᓚᐅᖅᓯᒪᔪᑦ 1976−ᒥ ᐋᑖᓃᑦᑐᑎᑦ ᐃᓄᐃᑦ ᑕᐱᕇᑦ ᑲᓇᑕᒥ ᓇᒻᒥᓂᖁᑎᐅᓂᐊᖅᑐᓂ ᑯᐊᐳᕇᓴᐅᓗᓂ ᑲᑎᒪᔨᖃᕐᓗᓂ ᑭᒡᒐᖅᑐᐃᔨᓂᒃ ᓄᓇᕗᒻᒥ ᐱᖓᓱᓂᒃ ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᐱᖓᓱᓂᒃ ᐊᕕᑦᑐᖅᓯᒪᔪᓂᒃ ᐱᕙᓪᓕᐊᔪᓕᕆᓂᕐᒦᖔᖅᑐᓂᒃ ᑯᐊᐳᕇᓴᒃᑯᓐᓂ.

ᑲᒻᐸᓂᐅᔪᖅ ᐱᕈᖅᐸᓪᓕᐊᑎᑦᑎᓚᐅᖅᑐᑦ ᐃᓪᓗᓕᕆᓂᕐᒥᑦ, ᓂᐅᕐᕈᑎᖃᕐᓂᕐᒥᑦ ᐃᓪᓗᓂᒃ, ᓱᓇᒃᑯᑖᕐᓂᑦ, ᐸᕐᓇᓂᕐᒥᑦ, ᐃᓗᐃᒃᑲᕐᓂᖅ ᐅᖅᓱᐊᓗᓐᓂ ᑐᖅᑯᖅᑕᐅᓯᒪᓂᖏᓐᓂ ᓂᐅᕐᕈᑎᖃᕐᓂᒥᓪᓗ ᐊᒻᒪᓗ ᐋᓐᓂᐊᕕᓕᐊᖅᑐᓂᑦ ᑐᔪᕐᒥᕕᒻᒥ, ᐱᖓᓱᓂᓪᓗ ᓚᒐᓂᑦ ᐋᑐᐋᒥ, ᐅᐃᓂᐹᒡᒥ ᐊᑦᒪᓐᑕᓐᒥᓗ.

ᒫᒋ ᐳᑐᓕᒃ ᐱᓕᕆᔨᒻᒪᕆᐅᓪᓗᓂ, ᐅᑭᐅᓄᑦ ᖁᓕᓄᑦ ᐃᖅᑲᓇᐃᔮᖃᓚᐅᖅᑐᓂ ᓄᓇᕗᒻᒥ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓄ ᐃᓄᓕᕆᔨᒃᑯᓄᓪᓗ, ᐱᔨᑦᑎᕋᖅᑎᐅᓪᓗᓂ.

“ᐅᑭᐅᒐᓴᐃᑦ ᐊᓂᒍᓚᐅᖅᑎᓪᓗᒋᑦ ᐃᖅᑲᓇᐃᔭᖅᑐᓂ ᓄᓇᕗᒻᒥ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑕᐃᓕᒪᔪᓕᕆᕐᒥᑦ, ᖁᕕᐊᑦᑐᖓ ᐱᓕᕆᓂᐊᕐᓂᕐᓂᑦ ᑯᐊᐳᕇᓴᒥᑦ ᕿᒥᕐᕈᓂᐊᖅᑐᖓᓪᓕ ᐊᔾᔨᐅᖏᑦᑐᓂᑦ ᒪᓂᒪᔾᔪᑎᔅᓴᓂᒃ,” ᐳᑐᓕᒃ ᐅᖃᖅᑐᓂ, ᐃᓚᒋᑦ ᑲᖏᖅᓱᐊᓗᒻᒦᙶᕐᓂᑯᑦ ᑲᖏᖅᖠᓂᕐᒥᓪᓗ.

ᐳᑎᓕᐅᑉ ᐃᓚᒋᑦ ᐱᓕᕆᐊᕆᓂᐊᖅᑕᖏᑦ ᐊᖏᓪᓕᒋᐊᓗᒋᑦ ᓛᒐᒥ ᐋᓐᓂᐊᕕᓕᐊᖅᐸᑦᑐᓄ ᐃᓪᓗᐃᑦ ᐋᑐᐋᒥ, ᐅᐃᓂᐸᒡᒥ ᐊᑦᒪᓐᑕᓐᒥᓪᓗ, ᐱᕈᖅᐸᓪᓕᐊᒋᐊᖃᓕᕐᖓᑕ ᐊᒥᓲᓄᑦ ᐅᐸᑦᑕᐅᕙᒻᒪᑦ ᓄᓇᕗᒻᒥᓯᐅᑕᕐᓄᑦ.

ᐳᑐᓕᒃ ᐱᕙᓪᓕᐊᓂᐊᕐᒥᔪᖅ ᐊᓯᖏᓐᓂ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᕐᓂᕐᒥᑦ ᓄᓇᕗᒻᒥᐅᑕᕐᓄᑦ, ᓲᕐᓗ ᐊᑯᓂᒧᑦ ᐱᓯᒪᔭᐅᕕᐅᒐᔭᖅᑐᒥᑦ ᓄᓇᕗᒻᒥ.

ᒪᓐᑐᕆᐊᒥᐅᑕᖅ ᐳᑐᓕᒃ ᐱᔨᑦᑎᕋᖅᑎᐅᖃᑦᑕᓚᐅᖅᓯᒪᒻᒥᔪᖅ ᐅᓪᓕᕕᒻᒥ, ᓄᓇᕕᒻᒥ ᓇᔪᖅᑕᐅᕕᒻᒥ ᐋᓐᓂᐊᔪᓄᑦ ᒪᓐᑐᕆᐊᒥ, ᐅᖃᖅᑐᓂᓗ ᑕᑯᓯᒪᒻᒪᑦ ᑕᐃᒪᐃᑦᑐᒥᑦ” ᐊᐅᓚᑦᑎᒍᓐᓇᖅᑐᒋᔪᖅ ᐋᓐᓂᐊᖅᑕᐃᓕᒪᔪᓕᕆᕕᒻᒥᑦ ᐃᓄᓐᓄᑦ ᓇᔪᖅᑕᐅᒍᓐᓇᖅᑐᓂᑦ.

ᑖᒃᑯᐊ ᐳᑐᓕᒃᑯᑦ, ᐋᓂ ᐊᓐᓂᕐᒥᐅᒃᑯᑦ ᒫᓐᓇᕈᓗᒃ ᓄᓇᓯᒃᑯᓐᓅᓚᐅᖅᑐᑦ ᐱᕈᖅᑎᑦᑎᖃᑕᐅᕙᓪᓕᐊᓂᐊᖅᑐᑦ ᒐᕙᒪᒃᑯᓐᓂ ᐃᓄᐃᓪᓗ ᓄᓇᓕᖏᓐᓂ ᑲᒪᖃᑦᑕᕐᓗᑎᑦ.

ᐸᓐᓂᑑᒥᐅᑕᒥᓂᖅ, ᐋᑐᐋᒥᐅᑕᖅ ᐊᓐᓂᕐᒥᐅᖅ ᐱᖁᔭᓕᕆᔨᐅᓚᐅᖅᑐᖅ ᐊᕕᑦᑐᖅᓯᒪᔪᓂᓪᓗ ᐅᖃᐅᔾᔨᒋᐊᖅᑎᐅᓪᓗᓂ ᑭᐅᕈᓕᓐ ᐸᓇᑦᒧᑦ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ.

ᓄᓇᓯ ᑯᐊᐳᕇᓴᒃᑯᑦ ᓯᕗᒃᑲᑕᖅᑕᐅᔪᑦ ᐊᖏᔪᖅᑲᒧ ᐊᒻᒪᓗ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᒧᑦ ᑭᓕᓐᔅ ᑕᐃᕕᔅᒧᑦ, ᑯᐊᕇᓴᒃᑯᓐᓅᓚᐅᖅᓯᒪᔪᖅ 2020−ᒥ.

ᓯᐅᕋ ᖄᔾᔪᔅ ᑎᑎᕋᖅᓯᒪᔭᖓ

ᓄᓇᑦᓯᐊᖅ ᐱᕙᓪᓕᐊᔪᓂᑦ ᐱᔭᐅᓯᒪᔪᑦ nunatsiaq.com