ᓄᓇᓯ ᑯᐊᐳᕇᓴᒃᑯᑦ ᓇᓗᓇᐃᖅᓯᓚᐅᖅᑐᑦ ᑎᒃᑯᐊᖅᓯᓂᖓᓐᓂ ᓄᑖᕐᒥᑦ ᐊᖏᔪᖅᑲᕐᒥᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᔅᓴᒥᑦ
ᒫᔾᔨ 2, 2020 – ᑲᑎᒪᔩᑦ ᓄᓇᓯ ᑯᐊᐳᕇᓴᒃᑯᓐᓂ ᓇᓗᓇᐃᖅᓯᒋᐊᒥᑦ ᖁᕕᐊᑉᐳᑦ ᑎᒃᑯᐊᖅᓯᓂᖓᓐᓂ ᑭᓕᓐᔅ ᑕᐃᕕᔅᒥᑦ ᐊᖏᔪᖅᑳᖑᓂᕐᒧᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓂᕐᒧᑦ ᓄᓇᓯᒃᑯᑦ ᑯᐊᐳᕇᓴᖓᓐᓄᑦ. ᑭᓕᓐᔅ ᑕᐃᕕ ᐱᓕᒻᒪᔅᓯᒪᑦᑎᐊᖅᑐᖅ ᐊᒻᒪᓗ ᑲᓇᑕᒥ ᐃᓕᓴᕆᔭᐅᓯᒪᓪᓗᓂ ᓇᒻᒥᓂᖃᖅᑎᐅᓂᕐᒧᑦ ᓯᕗᓕᖅᑎᐅᓯᒪᓂᖓᓐᓂ ᑲᔪᓯᑦᑎᐊᖅᓯᒪᓂᖓᓐᓄᑦ. ᐊᓯᖏᓐᓂᑦᑕᐅ ᐱᓕᕆᓯᒪᑦᑎᐊᕐᒥᔪᖅ ᐃᓄᐃᑦ ᓇᒻᒥᓂᖁᑎᖏᓐᓂ ᐱᕙᓪᓕᐊᓂᕐᒧᑦ ᐱᔨᑦᑎᕋᕐᓂᕐᒥᑦ ᐅᑭᐅᓄᑦ 11−ᓄᑦ ᐃᔅᓯᕙᐅᑕᐅᓚᐅᖅᓯᒪᓪᓗᓂ ᑲᑎᒪᔨᓄᑦ ᓄᓇᑦᓯᐊᕗᑦ ᑲᑐᔾᔨᔨᖏᓐᓄ ᑲᒻᐸᓂᖏᓐᓄᑦ.
ᑭᓕᓐᑦ ᒫᓐᓇᕈᓗᒃ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓚᐅᕐᒥᔪᖅ ᐅᐊᖕᓇᖓ 35 ᑳᐱᑐ ᐱᓕᕆᖃᑎᒋᓐᓄᑦ, ᓇᒻᒥᓂᖃᕐᓂᕐᒧᑦ ᐊᑭᑐᔫᑎᓄᓪᓗ ᐅᖃᐅᔾᔨᒋᐊᖅᑎᐅᓪᓗᓂ ᐱᓕᕆᖃᑎᖃᖅᑐᓂᒃ ᓄᓇᖃᖅᑳᖅᑐᒥᓂᕐᓂᑦ ᒐᕙᒪᐅᔪᓂᒃ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕆᓴᒥᑦ ᐱᕈᖅᐸᓪᓕᐊᓂᐊᖅᑐᓂᒃ ᐊᑭᑦᑐᕋᐅᑎᒍᓐᓇᕐᓂᕐᒧᑦ. ᓯᕗᓂᖓᓐᓂ, ᐊᖏᔪᖅᑳᑉ ᑐᖏᓕᕆᓚᐅᖅᑕᖓ ᓄᓇᖃᖅᑳᖅᑐᒥᓂᕐᓂᑦ ᑮᓇᐅᔭᒃᑯᕕᖓᓐᓂᑦ ᑐᕌᓐᑐ ᑐᒥᓐᔭᓐ ᑮᓇᐅᔭᒃᑯᕕᒃ ᑲᑐᔾᔨᖃᑎᒌᖏᓐᓂ.
ᑭᓕᓐ ᐃᖅᑲᓇᐃᔭᕆᐊᓯᓚᐅᖅᓯᒪᔪᖅ ᒪᓕᒐᓕᕆᔨᐅᓪᓗᓂ ᓴᐃᓐᑦ ᔮᓐᔅᒥᑦ, ᓅᐸᓪᓚᒥ ᓛᐸᑐᐊᒥᓗ, ᐅᐊᑦᑎᐊᕈ ᐱᔨᑦᑎᕋᖅᑎᐅᓕᖅᑐᓂ ᑭᒃᑯᑐᐃᓐᓇᕐᓄᑦ ᒐᕙᒪᑐᖃᒃᑯᓐᓂ ᑲᓇᑕᒥ. ᒐᕙᒪᒃᑯᓐᓂᒍᓐᓃᕐᖓᑦ ᓅᓚᐅᖅᓯᒪᔪᒃ ᑮᓇᐅᔭᒃᑯᕕᒃ ᒪᓐᑐᕆᐊᓪᒧᑦ ᑲᓇᑕᒥ ᐊᐅᓚᑦᑎᔨᐅᓪᓗᓂ ᓄᓇᖃᖅᑳᖅᑐᒥᓃᑦ ᑮᓇᐅᔭᒃᑯᕕᓐᖓᓐᓂ, ᐅᐊᑦᑎᐊᕈᒃᑲᓐᓂᖅ ᑲᓇᑕᒥ ᑲᑎᒪᔨᐅᖃᑕᐅᓪᓗᓂ ᓄᓇᖃᖅᑳᖅᑐᒥᓃᑦ ᓇᒻᒥᓂᖁᑎᓕᕆᓂᕐᒧᑦ ᐊᖏᔪᖅᑳᖑᓪᓗᓂ ᐊᒻᒪᓗ ᐃᖅᑲᓇᔭᖅᑎᓄ ᓯᕗᓕᖅᑎᐅᓪᓗᓂ.
ᑭᓕᓐᑦ ᐸᐃᑉᐹᖃᖅᑐᓂ ᓇᒻᒥᓂᖃᖅᑐᓕᕆᓂᕐᒧᑦ ᐊᑲᐃᑎᐊ ᓯᓚᑦᑐᖅᓴᕐᕕᔾᔪᐊᕐᒥ, ᐸᐃᑉᐹᖃᖅᑐᓂᓗ ᒪᓕᒐᓕᕆᓂᕐᒧᑦ ᑕᐅᓪᕼᐊᐅᓯ ᓯᓚᑦᑐᖅᓴᕐᕕᔾᔪᐊᖓᓐᓂ ᑭᒃᑯᑐᐃᓐᓇᕐᓂᑦ ᐱᔨᑦᑎᓂᕐᒧᑦ ᑕᐃᑲᓂ ᕼᐊᕗᑦ ᓯᓚᑦᑐᖅᓴᕐᕕᔾᔪᐊᖓᓐᓂ, ᐊᒻᒪᓗ ᑲᓇᑕᒥ ᒥᐊᓕᒐᐃᓪᓗ ᓄᓇᖓᓐᓂ ᐸᐃᑉᐹᖃᕆᓪᓗᓂ ᕗᓪᐳᕋᐃᑦ ᐃᓕᓐᓂᐊᕈᑎᒃᓴᑦᑎᐊᕙᒻᒥᑦ. ᐃᓕᓴᕆᔭᐅᓚᐅᖅᓯᒪᒋᓪᓗᓂᓗ 2016−ᒥ ᑲᔪᖏᖅᓴᐃᓂᕐᒧᑦ ᑐᓂᕐᕈᓯᐊᒥ ᓇᒻᒥᓂᖃᖅᑎᐅᓂᕐᒧᑦ ᐊᒻᒪᓗ ᐃᓕᓴᕆᔭᐅᓯᒪᒃᑲᓐᓂᕆᓪᓗᓂ ᐊᔾᔨᐅᖏᑦᑐᒥᑦ ᓯᓚᑦᑐᖅᓴᕐᕕᔾᔪᐊᕐᒥ ᐃᓕᓐᓂᐊᖅᑎᐅᓚᐅᖅᓯᒪᔪᖅ ᐸᐃᑉᐹᖃᕐᓂᖓᓐᓄᑦ ᐊᓪᒪ ᒫᑐ ᐊᑲᐃᑎᐊ ᓯᓚᑦᑐᖅᓴᕐᕕᔾᔪᐊᖓᓐᓂ.
“ᖁᕕᐊᑦᑎᐊᖅᑐᒍᑦ ᑭᓕᓐᑦ ᑕᐃᕕ ᐃᓚᒋᔭᐅᓕᕐᖓᑦ ᓄᓇᓯ ᑯᐊᐳᕇᓴᒃᑯᓐᓄᑦ ᐊᐅᓚᑦᑎᔨᐅᓂᐊᖅᑐᖅ ᑲᒻᐸᓂᑦᑎᓐᓂ ᐱᕈᖅᐸᓪᓕᐊᖏᓐᓇᓐᓂᐊᖅᑎᓪᓗᑕ,” ᐅᖃᖅᑐᓂ ᕼᐊᐅᕆ ᕕᓕᐅᕆᑎ, ᐃᔅᓯᕙᐅᑕᖅ ᓄᓇᓯ ᑯᐊᐳᕇᓴᒃᑯᓐᓄᑦ. “ᓄᓇᓯ ᐊᓯᔾᔨᓪᓚᕆᓯᒪᓕᕐᖓᑦ ᐅᑭᐅᓄᑦ ᑕᓪᓕᐅᒪᔪᓄᑦ ᐊᒻᒪᓗ ᓴᙵᑎᒃᑲᓐᓂᕆᐊᖃᕐᓂᐊᕐᖓᑦ ᑲᒪᒋᔭᐅᑦᑎᐊᕐᓗᑎᓪᓗ ᐅᑎᖅᑐᔅᓴᐃᑦ ᑕᐃᒃᑯᓄᖓ ᑎᒍᒥᐊᖅᑎᐅᖃᑕᐅᔪᓄᑦ.”
ᓄᓇᓯ ᑯᐊᐳᕇᓴᒃᑯᑦ 100%−ᒥᑦ ᐃᓄᓐᓄᑦ ᓇᒻᒥᓂᕆᔭᐅᔪᖅ ᐊᒻᒪᓗ ᓄᓇᕗᒻᒥ ᓇᒻᒥᓂᖃᕐᓂᕐᒧᑦ ᐱᕙᓪᓕᐊᖏᓐᓇᖅᑐᓂᑦ ᑲᒻᐸᓂᐅᔪᖅ. 1976−ᒥᓂᑦ, ᐃᓄᐃᑦ ᑕᐱᕇᑦ ᑲᓇᑕᒥ (ᒫᓐᓇ ᐃᓄᐃᑦ ᑕᐱᕇᑦ ᑲᓇᑕᒥᐅᔪᖅ) ᓴᖅᑮᓚᐅᖅᓯᒪᒻᒪᑕ ᐃᓄᓐᓂ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒥᑦ (ᒫᓐᓇ ᓄᓇᓯ ᑯᐊᐳᕇᓴᒃᑰᓕᖅᑐᑦ). ᑯᐊᐳᕇᓴᒃᑯᑦ ᓴᖅᑭᓚᐅᖅᓯᒪᔪᑦ ᐱᔾᔪᑎᖃᖅᑐᑎᑦ ᐃᓄᓐᓂᑦ ᐱᓕᕆᖃᑦᑕᕐᓂᐊᖅᑐᓂᒃ ᓇᒻᒥᓂᖃᖅᑎᐅᓂᕐᒥᑦ. ᓄᓇᓯ ᐱᕈᖅᐸᓪᓕᐊᒋᐊᓯᓚᐅᖅᓯᒪᔪᖅ ᐃᓪᓗᓕᐅᕐᓂᒃᑯᑦ, ᐃᖏᕐᕋᔪᓕᕆᓂᒃᑯᑦ, ᓂᐅᕐᕈᑎᖃᕐᓂᒃᑯᑦ, ᐸᕐᓇᓂᒃᑯᑦ, ᓯᕗᒧᐊᑉᐸᓪᓕᐊᓂᕐᒥᑦ, ᐃᓗᐃᒃᑳᐅᓈᖅᑐᒋᑦ ᐅᖅᓱᐊᓗᓐᓂ ᑐᖅᑯᐃᓂᖅ ᐊᒻᒪᓗ ᐊᑐᐃᓐᓇᐅᑎᑦᑎᓂᖅ, ᐋᓐᓂᐊᕕᓗᐊᖅᑐᓄᑦ ᐅᑕᖅᑭᕕᓐᓂᑦ, ᑏᕖᒃᑰᕈᓐᓇᐅᑎᓂᒃ ᐊᒻᒪᓗ ᓴᓇᓂᕐᒥᑦ.